دی خیبر ٹائمز: خصوصی تحریر
سیاسی عقیدت اور جذباتیت جب نوجوانوں کے عمل اور روزگار کی تلخ حقیقت سے ٹکراتی ہے، تو برسوں سے قائم اندھی عقیدت کے بت لمحوں میں پاش پاش ہو جاتے ہیں۔ بھارت میں ان دنوں کچھ ایسا ہی منظرنامہ دیکھنے کو مل رہا ہے، جہاں مختلف مسابقتی اور تعلیمی امتحانات کے پرچے افشاء (Paper Leak) ہونے کے مسلسل واقعات نے ملک کے طلبہ کے صبر کا پیمانہ لبریز کر دیا ہے۔ اسی شدید عوامی غصے اور بے باک مزاحمت کے بطن سے کاکروچ جنتا پارٹی (CJP) نامی ایک انوکھی اور جارحانہ نوجوان تحریک نے جنم لیا ہے، جس نے دہلی کے ایوانوں میں زلزلہ برپا کر رکھا ہے۔
گوتم سنگھ کا بدلتا بیانیہ: نعرے بازی سے حقیقت کے ٹکراؤ تک
اس جاری تحریک کا سب سے عبرت ناک اور دلچسپ رخ 21 سالہ گوتھم سنگھ کا بدلتا ہوا سیاسی موقف ہے۔ یہ وہی گوتم سنگھ ہے جو مارچ 2025ء میں مودی سرکار کے دفاع میں اس حد تک جذباتی ہو چکا تھا کہ اس نے امریکہ پر تنقید کرتے ہوئے ببانگ دہل کہا تھا: آٹا چاہے 15ہزار روپے تک فروخت ہونے لگے، لیکن ہمیں صرف مودی چاہئے۔
لیکن آج، وہی گوتم سنگھ مودی حکومت کی تعلیمی پالیسیوں کے خلاف سڑکوں پر دھرنا دئے بیٹھا ہے۔ جب احتجاج کے دوران کسی نے اس سے سوال کیا کہ اب امریکہ کیا کہتا ہے؟ تو اس نے تلخ حقیقت کا اعتراف کرتے ہوئے جواب دیا: وہ اب بھی یہی کہتے ہیں، آخر تم ہو کیا؟۔ اس نے بھارتی وزیر تعلیم پر برہم ہوتے ہوئے مزید کہا کہ “جب دھرمیندر پردھان بطور وزیر تعلیم نوجوانوں کو انصاف نہیں دے سکتے، تو انہیں ڈوب کر مر جانا چاہیے۔ گوتم کا یہ بدلاؤ اس بات کا واضح ثبوت ہے کہ جب مستقبل تاریک نظر آنے لگے تو سیاسی نعرے اپنا اثر کھو دیتے ہیں۔
دہلی سے گووا تک احتجاج کا پھیلاؤ اور کاکروچ جنتا پارٹی کے الزامات
امتحانی پرچوں کی خرید و فروخت کا یہ اسکینڈل اب صرف دارالحکومت نئی دہلی تک محدود نہیں رہا۔ بھارتی میڈیا اور سوشل میڈیا رپورٹس کے مطابق، نوجوانوں کا یہ غم و غصہ اب ممبئی، پٹنہ، کیرالا اور گووا جیسے اہم شہروں اور ریاستوں تک پھیل چکا ہے، جہاں ہزاروں کی تعداد میں طلبہ سڑکوں پر نکل کر بھارتی وزیرِ تعلیم کے فوری استعفے کا مطالبہ کر رہے ہیں۔
اس تحرک میں پیش پیش نوجوانوں کی تنظیم کاکروچ جنتا پارٹی (CJP) نے تعلیمی نظام کی زبوں حالی پر سخت موقف اپنایا ہے۔ سی جے پی کا کہنا ہے کہ تعلیمی اداروں اور وزارتوں میں اوپر سے لے کر نیچے تک نااہل اور فاسد لوگ براجمان ہیں جو طلبہ کے مستقبل سے کھیل کر صرف اپنا جیب گرم کر رہے ہیں۔ اس کے ساتھ ہی، کاکروچ جنتا پارٹی نے یہ سنگین الزام بھی عائد کیا ہے کہ حکمران جماعت (بی جے پی) کے حامی احتجاجی مقامات پر پتھراؤ کروا کر اس پرامن طلبہ تحریک کو بدنام کرنے کی ناکام کوششیں کر رہے ہیں۔
فیض احمد فیض کی نظم اور شبانہ اعظمی کی شرکت
اس طلبہ تحریک کو اس وقت ایک بڑی اخلاقی اور ثقافتی توانائی ملی جب نامور بھارتی اداکارہ شبانہ اعظمی خود مظاہرین کا حوصلہ بڑھانے کیلئے احتجاجی کیمپ پہنچ گئیں۔ انہوں نے سڑکوں پر بیٹھے ہزاروں پرامید نوجوانوں کے سامنے مشہور زمانہ شاعر فیض احمد فیض کی انقلابی نظم بول کہ لب آزاد ہیں تیرے سنا کر مظاہرین کے جذبوں کو ایک نئی جلا بخشی، جس نے اس احتجاج کو ایک باقاعدہ فکری و تحریکی شکل دے دی ہے۔
مودی کا ڈیڑھ ماہ بعد نوٹس اور کاکروچ جنتا پارٹی کا دو ٹوک جواب
سڑکوں پر اٹھنے والے اس طوفان کے نتیجے میں، ڈیڑھ ماہ کی طویل خاموشی کے بعد بالآخر بھارتی وزیراعظم نریندر مودی کو ہوش آیا۔ انہوں نے سماجی رابطے کی ویب سائٹ ایکس (سابقہ ٹویٹر) پر ایک بیان جاری کرتے ہوئے کہا کہ نوجوانوں کی فلاح اور ان کا مستقبل حکومت کی پہلی ترجیح ہے۔ مودی نے اعلان کیا کہ پرچے لیک کرنے میں ملوث افراد کو فوری اور سخت ترین سزائیں دینے کیلئے فاسٹ ٹریک عدالتیں قائم کی جائیں گی اور مجرموں کو کسی صورت بخشا نہیں جائے گا۔
تاہم کاکروچ جنتا پارٹی نے وزیراعظم کے اس اعلان کو محض ایک سیاسی ڈرامہ قرار دے کر رد کر دیا۔ سی جے پی کے ترجمان نے واضح کیا کہ ڈیڑھ ماہ کی تاخیر کے بعد لیا جانے والا یہ نوٹس انتہائی ناکافی ہے اور محض زبانی جمع خرچ ہے۔ انہوں نے اعلان کیا کہ جب تک تعلیمی نظام کی اصلاح نہیں کی جاتی اور نااہل وزیر تعلیم اپنے عہدے سے مستعفی نہیں ہوتے، ان کا دھرنا اور ملک گیر احتجاج اسی طرح جاری رہے گا۔
دی خیبر ٹائمز کے اس تحقیقی جائزے کے مطابق، کاکروچ جنتا پارٹی کا قیام اور گوتم سنگھ جیسے جنونی حامیوں کا سڑکوں پر آ جانا اس بات کا اشارہ ہے کہ بھارتی سیاست میں اب محض جذباتی نعروں سے کام نہیں چلے گا۔ تعلیمی نظام کی تباہی اور بے روزگاری نے بھارتی نوجوانوں کو ایک ایسے موڑ پر لا کھڑا کیا ہے جہاں وہ اب اقتدار کے ایوانوں سے راست سوال کر رہے ہیں۔ اگر مودی حکومت نے ان نوجوانوں کے مطالبات کو سنجیدگی سے نہ لیا، تو یہ احتجاجی لہر آنے والے دنوں میں ایک بڑے سیاسی زلزلے کا پیش خیمہ ثابت ہو سکتی ہے۔