ڈیرہ اسماعیل خان: ڈیرہ اسماعیل خان کے علاقے درازندہ میں پولیس، کسٹمز اور ایکسائز کی مشترکہ چیک پوسٹ پر خودکش حملے کے نتیجے میں ابتدائی اطلاعات کے مطابق 11 افراد شہید اور 30 سے زائد زخمی ہوگئے ہیں۔
ذرائع کے مطابق حملہ ایک نئی تعمیر شدہ مشترکہ چیک پوسٹ کو نشانہ بنا کر کیا گیا۔ دھماکے کے فوراً بعد علاقے میں فائرنگ کی آوازیں بھی سنی گئیں۔
واقعے کے بعد پولیس، ریسکیو 1122 اور دیگر امدادی اداروں کی ٹیمیں جائے وقوعہ پر پہنچ گئیں اور زخمیوں کو قریبی اسپتالوں منتقل کیا گیا، جہاں ایمرجنسی نافذ کردی گئی ہے۔
ذرائع کے مطابق متعدد زخمیوں کی حالت تشویشناک ہے اور ہلاکتوں میں اضافے کا خدشہ ہے۔
سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے۔ فائرنگ کے بعد ممکنہ طور پر حملہ آور کے ساتھیوں کی موجودگی کے خدشے کے پیش نظر بھی کارروائی کی جارہی ہے۔
خبر فائل ہونے تک کسی تنظیم نے حملے کی ذمہ داری قبول نہیں کی تھی۔
درازندہ بلوچستان کی سرحد کے قریب واقع ڈیرہ اسماعیل خان کا اہم علاقہ ہے۔ علاقے میں ماضی میں کالعدم تحریک طالبان پاکستان اور دیگر عسکریت پسند گروہوں کی کارروائیاں سامنے آتی رہی ہیں تاہم موجودہ حملے میں کسی تنظیم کے ملوث ہونے کی آزادانہ یا سرکاری تصدیق تاحال سامنے نہیں آئی۔
شہید اور زخمی ہونے والوں کی تعداد ابتدائی اطلاعات پر مبنی ہے اور سرکاری و اسپتال ذرائع سے مزید تصدیق کے بعد تعداد میں تبدیلی ممکن ہے۔
