بھارت میں تعلیمی نظام کی خامیوں، بالخصوص پرچوں کی افشائی (پیپر لیک) کے خلاف کاکروچ جنتا پارٹی (CJP) کے زیراہتمام جاری طلبا احتجاج ایک بڑی عوامی تحریک کی شکل اختیار کر چکا ہے۔ تعلیمی اصلاحات کی اس جدوجہد کو جہاں عوام اور والدین کی بھرپور ہمدردی حاصل ہو رہی ہے، وہیں بالی وڈ کے سپر اسٹار سلمان خان کا کھلم کھلا حمایت میں سامنے آنا اس تحریک کیلئے ایک انتہائی اہم موڑ ثابت ہوا ہے۔
کاکروچ جنتا پارٹی کی جانب سے طلبا کے بنیادی حقوق اور تعلیمی شفافیت کیلئے اٹھائی جانے والی آواز نے ملک بھر کے نوجوانوں کے دلوں میں جگہ بنا لی ہے۔ تعلیمی اداروں میں مسلسل ہونے والی بے ضابطگیوں اور پیپر لیک کے واقعات سے مایوس طلبا کو اس پارٹی کے بیانیے میں امید کی ایک کرن نظر آئی، جس کے باعث سی جے پی کی مقبولیت میں غیر معمولی اضافہ ہوا ہے۔
عام شہریوں اور والدین کا ماننا ہے کہ بچوں کا مستقبل محفوظ بنانا کسی بھی معاشرے کی پہلی ترجیح ہونی چاہئے۔ یہی وجہ ہے کہ جب سی جے پی کی قیادت میں طلبا سڑکوں پر نکلے تو والدین نے بھی اپنے بچوں کا شانہ بشانہ ساتھ دیا، جس نے اس تحریک کو ایک حقیقی عوامی شکل دے دی ہے۔
سوشل میڈیا پلیٹ فارم ایکس (سابقہ ٹویٹر) پر اپنے ایک تفصیلی اور جذباتی بیان میں بالی وڈ اسٹار سلمان خان نے اس احتجاج کی حمایت کرتے ہوئے طلبا کے جذبے کو سراہا۔
سلمان خان کا کہنا تھا:
یہ ایک بہت پُرامن تحریک تھی لیکن یہ دیکھ کر بہت افسوس ہوا کہ یہ پرتشدد رخ اختیار کر گئی۔ جن طلبا اور ان کے اہلخانہ کو اس دوران نقصان پہنچا، ان کے لیے میرا دل دکھی ہے۔
انہوں نے مزید کہا کہ پیپر لیک کا معاملہ انتہائی سنگین ہے اور انہیں اس بات کی خوشی ہے کہ ملک کا نوجوان ایک بہتر اور شفاف تعلیمی نظام کیلئے متحد ہو کر سامنے آیا ہے۔ سلمان خان نے خاص طور پر ان والدین کی تعریف کی جنہوں نے اس جدوجہد میں اپنے بچوں کا بھرپور ساتھ دیا۔
سلمان خان نے اپنے بیان میں طلبا کی ہمت، بہادری اور تعلیم سے محبت کا اعتراف کرتے ہوئے چند اہم نکات پر روشنی ڈالی، طلبا نے اپنی محنت اور خلوص سے یہ ثابت کیا ہے کہ وہ دل لگا کر پڑھنا چاہتے ہیں اور ایک زیادہ تعلیم یافتہ اور ترقی یافتہ بھارت کی تعمیر میں اپنا کردار ادا کرنا چاہتے ہیں، یہ تحریک اور احتجاج بالکل درست سمت میں اٹھایا گیا قدم تھا جسے طلبا نے نہایت پُرامن انداز میں آگے بڑھایا۔
سلمان خان نے زور دے کر کہا کہ یہ معاملہ طلبا اور تعلیمی نظام کے درمیان ہے، اس لئے اسے سیاسی رنگ نہیں دیا جانا چاہئے۔ اس کامیابی کا اصل سہرا صرف اور صرف محنت کش طلبا کے سر جاتا ہے۔
احتجاز کے پرتشدد رخ اختیار کرنے پر جہاں عوامی حلقوں میں تشویش کی لہر دوڑی، وہی متاثرہ طلبا اور ان کے خاندانوں کیلئے عوامی ہمدردی میں مزید اضافہ ہوا ہے۔ سلمان خان نے امید اور دعا کی کہ اس معاملے کا مثبت حل نکلے گا۔ انہوں نے حکومت پر زور دیا کہ وہ طلبا کی بھرپور حمایت کرے اور تعلیمی نظام کو مضبوط بنانے کیلئے فوری و ضروری اقدامات کرے تاکہ سب کا فائدہ ہو سکے۔
کاکروچ جنتا پارٹی کا یہ احتجاج اب محض ایک سیاسی یا طلبا مظاہرہ نہیں رہا بلکہ تعلیمی نظام کی بہتری کیلئے ایک قومی آواز بن چکا ہے۔ سلمان خان کی حمایت اور عوام کی ہمدردی نے ثابت کر دیا ہے کہ تعلیمی شفافیت پر کوئی سمجھوتہ نہیں کیا جا سکتا، اور ملک کے روشن مستقبل کی چابی انہی محنتی طلبا کے ہاتھوں میں ہے۔
