زندگی سے مایوس اور ناکام لوگ ہی خود کشی جیسا انتہائی قدم اُٹھاتے ہیں۔ اس کی وجوہات محبت میں ناکامی ، غربت، اور گھریلو حالات سے تنگ ہونا شامل ہیں۔ بالی ووڈ فلم انڈسٹری میں بھی حالیہ دنوں میں خود کشی کے رجحان میں اضافہ ہوا ہے، جس میں کئی بڑے بڑے اداکاروں اور بظاہر کامیاب لوگوں کے نام بھی شامل ہیں۔ لیکن کیا یہ سب ناکام لوگ تھے جنہوں نے خود کشی کا راستہ اپنایا یا پھر اس کے پیچھے دیگر جوہات بھی ہوسکتی ہیں جن کو سامنے رکھ کر کہا جا سکتا ہے کہ بظاہر ہر قسم کے عیش و آرام اور دنیاوی راحتوں میں زندگی گزارنے والے اداکار یا فلمی دنیا سے جُڑے ہوئے لوگ خودکشی پر کیوں مجبور ہو جاتے ہیں ۔
بالی ووڈ فلم سٹار جن کے حسن کے بڑے چرچے تھے اور جن کی معصومیت پرایک دنیا فدا تھی یعنی دیویا بھارتی جنہوں نے ایک سال کے مختصر عرصے میں بالی ووڈ کی 14 سپر ہٹ فلمیں کیں اور مختصر عرصے میں مادھوری ڈکشٹ سمیت تمام اداکاراؤں کا ریکارڈ توڑدیا تھا۔وہ 25 اپریل 1974کو پیدا ہوئی تھیں،اور 05 اپریل 1993 کو اپنی چار منزلہ فلیٹ سے گر کر ہلاک ہوئیں، جو ظاہری طورپر خود کشی قرار دی گئی۔ تاہم بعد میں ان کی موت کو شک کی نگاہ سے دیکھا جانے لگا اور آج تک دیویا بھارتی کی موت پراسرار پردوں میں لپٹی ہو ئی ہے ۔
گورو دھت ۔۔ اپنے وقت کے انتہائی کامیاب پروڈیوسر، ہدایتکار، اور اداکار مانے جاتے تھے، گورو دھت کی پیدائش 09جولائی 1925کو ہوئی تھی، 10اکتوبر 1964کو شراب کے ساتھ نیند کی گولیاں کھانے سے ان کی موت واقع ہوئی ۔۔۔ جڈے خود کشی قراردیاگیا۔
کولجیت راندھاوا، اپنے دور کی کامیاب ٹی وی اور سینما اداکارہ تھیں، ان کی تاریخ پیدائش 08جنوری 1976تھی، جبکہ 08 فروری 2006 کو پنکھے سے لٹک کر خودکشی کی تھی،کونال سنگھ بھی ایک مشہور بالی ووڈ اداکار تھے، انہوں نے کافی فلموں میں کام کیا، ان کی تاریخ پیدائش 29 ستمبر1977تھی جبکہ 2008 کو پنکھے سے لٹک کر خودکشی کی تھی، جس کی وجہ بیوی سے نا چاقی بتائی گئی تھی۔ جو علیحدگی کے بعد بچوں سے ان کی ملاقات تک نہیں کرواتی تھی۔
من موہن ڈیسائی، اپنے دور میں معروف اور مشہور فلم پروڈیوسر اور ڈائریکٹر مانے جاتے تھے، ان کی تاریخ پیدائش 26 فروری 1937 ہے، جبکہ 01مارچ 1994کوگھر کی بالکونی سے گر کر ان کی موت ہوئی تھی۔ تاہم واقفان حال کا کہنا تھا کہ وہ گرے نہیں تھے بلکہ چھلانگ لگا کر خود کشی کی تھی۔
نفیسہ جوزف جنہوں نے اپنی خوبصورتی اور ناز و ادا کی بدولت 1997 کا مس انڈیا کا ایوارڈ بھی اپنے نام کیا تھا، ٹی وی ماڈل ، پریزینٹر اور اداکارہ تھیں، ان کی پیدائش 28 مارچ 1978 کو ہوئی تھی، جبکہ 29 جولائی 2004کو انہوں نے پنکھے سے لٹک کر خود کشی کی تھی ، ان کی خود کشی کی وجہ ان کی لو میرج کے نتیجے میں ہونے والا شوہر تھا جس کے بارے میں انہیں شادی سے چند روز پہلے معلوم ہوا کہ موصوف تو پہلے سے شادی شدہ اور دو بچوں کا باپ تھا۔
سلک سمیتھا۔۔۔ اپنے دور کی مشہور اداکارہ تھیں، جنہوں نے ہندی، تامل اور مراٹھی کی4 سو سے زائد فلموں میں کام کیا تھا۔ ان کی تاریخ پیدائش 2 دسمبر 1960 ہے، انہوں نے بھی پنکھے سے لٹک کر اپنی زندگی کا خاتمہ کیاتھا، ان کی خود کشی کی وجہ فلموں میں مسلسل ناکامی بتائی گئی تھی۔
ویویکا باباجی۔۔ مشہور ماڈل اور اداکارہ تھیں، 1993-94جس نے کئی بڑے عالمی ایوارڈز بھی اپنے نام کئے تھے، ویویکا 27 مئی 1973 کو پیدا ہوئی تھیں۔ انہوں نے بھی 25 مئی 2010 کو پنکھے سے لٹک کر اپنی زندگی کا خاتمہ کردیاتھا۔ تحقیقاتی اداروں کے مطابق اداکاری میں مسلسل ناکامی کے بعد انہوں نے اپنی زندگی کا خاتمہ کردیا۔شیکھا جوشی بھی بالی ووڈ انڈسٹری کی بہترین ماڈل اور اداکارہ تھیں، ان کی 2013 میں آخری ریلیز ہونے والی فلم بی اے پاس تھی جس میں ان کی اداکاری کو خوب سراہا گیا تاہم وہ اپنی اس کامیابی کو دیکھنے سے پہلے ہی اس دنیا سے کوچ کر گئیں ، ان کی موت 16 مئی 2015 کو گھر میں واقع باتھ روم میں اپنا گلہ چھری سے کا ٹنے سے ہوئی۔ پولیس تحقیقات کے مطابق انہوں نے بھی خود کشی کی تھی، ان کی خود کشی کی وجوہات میں مسلسل بے روزگاری اور فلموں کی ناکامی ایک بڑی وجہ قرار دی گئی تھی۔
جیا خان۔ برٹش امریکن اور انڈین گلوکارہ اور اداکارہ تھیں، انہوں نے بالی ووڈ کی تین کامیاب فلموں میں اداکاری کے جوہر دکھائے، فلم گجنی ، نشبد، اور ہاؤس فل میں بہترین پرفارمنس کی بدولت صف اول کی اداکاراؤں میں شامل ہوئیں، ان کی پیدائش 20فروری 1988کو ہوئی تھی، انہوں نے اپنے کمرے میں پنکھے سے لٹک کر خود کشی کی، ان کی خود کشی کی وجہ سورج پنچولی تھا، جس نے ان کے ساتھ بے وفائی کی، جس کے غم میں انہوں نے اپنی زندگی کا خاتمہ کردیا۔ اس طرح حال ہی میں جدید دور کے مشہور اور ہر دلعزیز اداکار سوشانت سنگھ راجپوت کی خودکشی کی خبروں نے پوری دنیا کو ہلا کر رکھ دیا۔ ان کی حال ہی میں ریلیز ہونے والی فلم چھچورے نے ریکارڈ توڑ بزنس کیا تاہم ان کی فلم پی کے سرفراز کے کردار سے ان کو عالمگیر شہرت ملی ۔ان کی لاش ان کے فلیٹ میں پڑی ملی ان کی موت کی وجوہات تاحال معلوم نہ ہو سکیں ۔ فلمی دنیا بظاہر عیش و عشرت اور حسن و ادا کی دنیا بتائی جاتی ہے جس میں نہ صرف دنیا کی حسین ترین دوشیزائیں اپنے حسن کے جلوے بکھیرتی ہیں بلکہ فلموں میں کام کرنے والے اداکاروں اور اداکاراؤں کے بارے میں عام تاثر یہ بھی ہے کہ وہ پیسوں میں تولے جاتے ہیں لیکن اس کے باوجود وہ کونسی وجوہات ہیں جن کی وجہ سے فلمی دنیا میں خود کشیوں کا گراف کافی بلند ہو رہا ہے ۔
