پشاور (دی خیبر ٹائمز مانیٹرنگ ڈیسک) الخدمت فاؤنڈیشن کے “بنو قابل پروگرام” کے تحت مفت آئی ٹی کورسز مکمل کرنے والے طلبہ و طالبات کے پہلے بیج میں اسناد اور پوزیشن ہولڈرز میں لیپ ٹاپس کی تقسیم کا آغاز کر دیا گیا۔ اس موقع پر منعقدہ پروقار تقریب میں امیر جماعت اسلامی پاکستان و بانی “بنو قابل پروگرام” انجینئر حافظ نعیم الرحمن مہمانِ خصوصی تھے، جنہوں نے نہ صرف اسناد اور لیپ ٹاپس تقسیم کیے بلکہ فیز 2 کا بھی باقاعدہ افتتاح کیا۔
پہلے مرحلے میں 10 ہزار طلبہ نے کورسز مکمل کیے
الخدمت فاؤنڈیشن خیبرپختونخوا کے صدر خالد وقاص نے بتایا کہ پہلے مرحلے میں صوبہ بھر سے 10 ہزار سے زائد طلبہ نے تین ماہ کے 16 مفت آئی ٹی کورسز مکمل کیے، جو نوجوانوں کے لیے مہارت اور خود انحصاری کا ذریعہ بن رہے ہیں۔ انہوں نے بتایا کہ دوسرے مرحلے میں مزید 28 کورسز شامل کیے گئے ہیں، جو آئندہ نوجوانوں کے لیے مزید مواقع فراہم کریں گے۔
تقریب میں شخصیات کی بھرپور شرکت
نشتر ہال پشاور میں منعقدہ تقریب میں الخدمت فاؤنڈیشن پاکستان کے صدر پروفیسر ڈاکٹر حفیظ الرحمن، امیر جماعت اسلامی خیبرپختونخوا وسطی عبدالواسع، صوبائی جنرل سیکرٹری صابر حسین اعوان، ضلعی امیر بحراللہ خان ایڈووکیٹ، پروگرام ڈائریکٹر میاں صہیب الدین کاکاخیل، سرحد چیمبر آف کامرس کے صدر فضل مقیم خان، مختلف یونیورسٹیوں کے پروفیسرز، ماہرین تعلیم، صحافی، سوشل میڈیا ایکٹوسٹس، طلبہ اور والدین کی بڑی تعداد نے شرکت کی۔
تعلیم، نوجوان اور طبقاتی نظام پر تنقید
تقریب سے خطاب کرتے ہوئے حافظ نعیم الرحمن نے کہا کہ:
“بدقسمتی سے قیام پاکستان سے آج تک تعلیم حکمرانوں کی ترجیحات میں نہیں رہی۔ طبقاتی نظام تعلیم نے ملک کو پیچھے دھکیلا ہے۔”
انہوں نے کہا کہ بنو قابل پروگرام نوجوانوں کے لیے امید کی کرن بن چکا ہے اور حکومت کو ایسے پروگرامز کی سرپرستی کرنی چاہیے۔ انہوں نے زور دیا کہ:
حکومت سرکاری تعلیمی اداروں کے بجٹ میں اضافہ کرے،
یونیورسٹیوں کی نجکاری بند کرے،
یکساں نصاب، نظام اور زبان کو نافذ کرے تاکہ تعلیم کا نظام موثر اور منصفانہ بن سکے،
انہوں نے اپنے خطاب میں فلسطین کے مظلوم عوام سے اظہار یکجہتی بھی کیا اور کہا:
“ہم غزہ اور فلسطین کے ساتھ کھڑے ہیں۔ حکومت پاکستان کو عالمی سطح پر فلسطینیوں کی کھل کر حمایت کرنی چاہیے۔”
تقریب کے اختتام پر بنو قابل پروگرام کے تحت پہلے بیج کے کامیاب طلبہ و طالبات کو اسناد جبکہ پوزیشن ہولڈرز کو لیپ ٹاپس پیش کیے گئے۔
مزید تصاویر اور ویڈیوز کے لیے وزٹ کریں: www.thekhybertimes.com
