رزمک (دی خیبرٹائمز مانیٹرنگ ڈیسک) تحصیل رزمک میں ثقافت، موسیقی اور امن کا حسین امتزاج پیش کرتا ہوا “دا رزمک رنگونہ فیسٹیول” شاندار انداز میں منعقد ہوا، جس میں مختلف شعبہ ہائے زندگی سے تعلق رکھنے والے افراد نے بھرپور شرکت کی۔
تقریب کے مہمانانِ خصوصی میں ایڈیشنل اسسٹنٹ کمشنر رزمک، ایس ایچ او رزمک، ایڈیشنل ایس ایچ او رزمک شامل تھے، جبکہ علاقے کے معزز مشران، نوجوان، خواتین، پختونخوا ریڈیو رزمک کی ٹیم اور بڑی تعداد میں عام عوام بھی موجود تھے۔
ادب، موسیقی اور ثقافت کا حسین امتزاج
فیسٹیول کے دوران مقامی شعراء نے دل کو چھو لینے والے اشعار پیش کیے جنہوں نے سامعین کو نہ صرف محظوظ کیا بلکہ علاقائی ادب کی خوبصورت جھلک بھی پیش کی۔
پشتون سنگرز کی پرفارمنس نے حاضرین کو جھومنے پر مجبور کر دیا اور مقامی موسیقی کا جادو ہر عمر کے شرکاء پر چھا گیا۔
فوڈ سٹالز اور روایتی کھانے
تقریب میں لگائے گئے فوڈ سٹالز پر پیش کیے گئے پشتون ثقافتی کھانوں نے شرکاء کی توجہ حاصل کی۔ مہمانوں نے چپل کباب، کابلی پلاو، شینواری گوشت اور دیگر روایتی پکوان سے خوب لطف اٹھایا۔
مارشل آرٹس اور یوتھ پرفارمنسز
فیسٹیول میں نوجوانوں نے مارشل آرٹس، اسٹنٹس اور دیگر شو کیسز کے ذریعے اپنی صلاحیتوں کا بھرپور مظاہرہ کیا۔ ان پرفارمنسز نے یہ ثابت کیا کہ علاقے کے نوجوان نہ صرف باصلاحیت ہیں بلکہ مثبت سرگرمیوں کے خواہاں بھی ہیں۔
امن، بھائی چارہ اور ثقافت کا پیغام
یہ فیسٹیول نہ صرف تفریح کا ذریعہ تھا بلکہ اس کا بنیادی مقصد علاقے میں امن، بھائی چارے، ثقافتی ورثے کے تحفظ اور نوجوانوں کو مثبت سرگرمیوں کی طرف راغب کرنا بھی تھا۔
شرکاء نے انتظامیہ کی اس کوشش کو خوب سراہا اور اس جیسے مزید فیسٹیولز کے انعقاد کا مطالبہ کیا۔
فیسٹیول کا دوسرا دن کل بھی جاری رہے گا
منتظمین کے مطابق، “دا رزمک رنگونہ فیسٹیول” کل بھی سہ پہر 2 بجے سے 5 بجے تک جاری رہے گا، جس میں مزید دلچسپ پروگرامز پیش کیے جائیں گے۔
