مردان (دی خیبر ٹائمز مانیٹرنگ ڈیسک) مشیر اطلاعات خیبر پختونخوا بیرسٹر ڈاکٹر سیف نے سانحۂ سوات سیلاب میں شہید ہونے والے مردان کے ایک ہی خاندان کے تین افراد کے گھر پہنچ کر لواحقین سے دلی ہمدردی کا اظہار کیا۔ ان کے ہمراہ معاونِ خصوصی برائے ٹیکنیکل ایجوکیشن طفیل انجم اور ڈائریکٹر جنرل اطلاعات انصاراللہ خلجی بھی موجود تھے۔
حکومتی وفد نے وزیراعلیٰ خیبر پختونخوا کی جانب سے تعزیتی پیغام بھی پہنچایا اور یقین دہانی کرائی کہ صوبائی حکومت غم کی اس گھڑی میں متاثرہ خاندان کے ساتھ کھڑی ہے۔
اس موقع پر بیرسٹر ڈاکٹر سیف نے میڈیا سے گفتگو کرتے ہوئے کہا کہ سانحۂ سوات پر پوری قوم غمزدہ ہے اور اس سانحے میں غفلت برتنے والے افراد کے خلاف سخت کارروائی کی جا رہی ہے۔ ان کا کہنا تھا کہ موسمی حالات پر کسی کا اختیار نہیں، تاہم متعلقہ اداروں کی غفلت ہرگز برداشت نہیں کی جائے گی۔
انہوں نے کہا کہ ابتدائی تحقیقات کی روشنی میں کچھ ذمہ داران کو ان کے عہدوں سے ہٹا دیا گیا ہے، جبکہ وزیراعلیٰ نے اعلیٰ سطحی تحقیقاتی کمیٹی تشکیل دے دی ہے، جس نے تحقیقات کا آغاز کر دیا ہے۔ رپورٹ موصول ہونے کے بعد مزید ذمہ دار افراد کے خلاف بھی کارروائی کی جائے گی۔
بیرسٹر ڈاکٹر سیف نے اعلان کیا کہ حکومت کی جانب سے متاثرہ خاندان کو جلد معاوضہ فراہم کیا جائے گا تاکہ ان کے زخموں پر کچھ مرہم رکھا جا سکے۔
