پشاور ( دی خیبرٹائمز پولیٹیکل ڈیسک ) خیبر پختونخوا کے وزیراعلیٰ محمود خان نے موجودہ صورتحال میں ہاوسنگ اور تعمیرات کے شعبوں کے فروغ کو حکومت کی ترجیحات میں سرفہرست قرار دیا ہے۔انہوں نے تمام متعلقہ محکموں کو ہدایت کی ہے، کہ ان شعبوں کو نجی سرمایہ کاری کے لئے پر کشش بنانے اور سرمایہ کاروں کو زیادہ سے زیادہ مراعات اور سہولیات دینے کے لئے ایک قابل عمل اور جامع پلان تشکیل دیا جائے۔ پشاور میں ایک اجلاس کی صدارت کرتے ہوئے وزیراعلیٰ نے مزید ہدایت کی، کہ نجی شعبے میں ہاوسنگ اسکیموں کے لئے زمین کی خریداری اور نقشوں کی منظوری سمیت تمام مراحل کو آسان بنانے کے لئے متعلقہ رولز اور قواعد وضوابط میں ضروری ترامیم کی جائیں ۔اجلاس میں صوبے میں روزگار کے مواقع پیدا کرنے کے سلسلے میں ان شعبوں کو فوری طور پر ترقی دینے کے لئے سرمایہ کاروں کو زیادہ سے زیادہ سہولیات اور مراعات کی فراہمی سے متعلق مختلف امور کا تفصیلی جائزہ بھی لیا گیا۔
