بنوں ( محمد وسیم سے ) المناک حادثہ بنوں میرانشاہ روڈ پر اس وقت پیش آیا جب ریسکیو 1122 کی ایمبولینس گاڑی مریض کو لیکر میرعلی سے بنوں آرہی تھی کہ تھانہ بکاخیل کی حدود میں واقع بنوں میران شاہ روڈ نزد سیدگی سرملہ کے مقام پر پہنچی تو مخالف سمت سے آنے والی ڈمپر گاڑی سے ٹکرا گئی جس کے نتیجے میں گاڑیوں میں آگ بھڑک اٹھی جبکہ ایمبولینس میں سوار تمام آفراد موقع پر جاں بحق ہوگئے جس میں ایک ریسکیو اہلکار بھی شامل ہے ۔
واقعہ کی اطلاع ملتے ہی سرکل آفیسر وزیر سب ڈویژن ملک شیراکبر خان نے نفری کے ہمراہ پہنچ کر امدادی کارروائیوں میں حصہ لیا جاں بحق ہونے والوں میں حاجی محمد غفران ولد سبحان ، علی خان ولد علی جہان ، احمد اللہ ولد محمد ساکنان ہمزونی میران شاہ ، محمد اعظم شاہ ولد صمد شاہ ساکن میرعلی اور دیر اسمال ولد سخی ساکن مداخیل میران شاہ شامل ہیں اسی طرح قدیم خان ولد کریم خان، غازی جنان ولد سبحان ساکنان ہمزونی میران شاہ زخمی ہو گئے ہیں جاں بحق اور زخمیوں کو بنوں ڈی ایچ کیو ہسپتال منتقل کردیا گیا۔
