خیبر پختونخوا حکومت کا تعلیمی شعبے میں بڑا اقدام: مفت اسکول بیگز اور کتابیں فراہم کرنے کا فیصلہ

پشاور (ویب ڈیسک) – خیبر پختونخوا حکومت نے تعلیم کے شعبے میں اہم اور انقلابی فیصلہ کرتے ہوئے سرکاری اسکولوں کے طلبہ کو مفت اسکول بیگز اور مفت درسی کتابیں فراہم کرنے کا اعلان کیا ہے۔ اس اقدام کا مقصد نہ صرف غریب والدین پر مالی بوجھ کم کرنا ہے بلکہ صوبے میں داخلہ مہم کو مؤثر بنانا بھی ہے۔

ترجمان خیبر پختونخوا حکومت بیرسٹر ڈاکٹر سیف کے مطابق، حکومت نے طلبہ کو تعلیمی سہولیات مہیا کرنے کے لیے کئی بڑے فیصلے کیے ہیں۔ ان میں پیرنٹ ٹیچر کونسل (PTC) کے فنڈ کو 5 ارب سے بڑھا کر 7 ارب روپے کرنا بھی شامل ہے۔

ڈاکٹر سیف نے کہا کہ خیبر پختونخوا نے تعلیم کے میدان میں دیگر صوبوں پر سبقت حاصل کر لی ہے۔ ان کا مزید کہنا تھا کہ وزیر اعلیٰ علی امین گنڈاپور، چیئرمین عمران خان کے وژن کے مطابق تعلیم کی ترقی کے لیے عملی اقدامات کر رہے ہیں۔

انہوں نے پنجاب حکومت اور مریم نواز کو بھی مشورہ دیا کہ وہ خیبر پختونخوا کی تعلیمی پالیسی کو اپنائیں۔ ڈاکٹر سیف کا کہنا تھا:

“ہم چاہتے ہیں کہ پنجاب کے بچے بھی خوشحال، تعلیم یافتہ اور روشن مستقبل کے حامل ہوں۔ مریم نواز کو چاہیے کہ علی امین گنڈاپور کے تعلیمی ماڈل سے سبق سیکھیں، نہ کہ صرف سوشل میڈیا ویڈیوز کے ذریعے مقبولیت حاصل کریں۔”

خیبر پختونخوا حکومت کے ان اقدامات کو تعلیمی ماہرین کی جانب سے بھی سراہا جا رہا ہے۔ ماہرین کے مطابق یہ فیصلے نہ صرف تعلیم کے فروغ بلکہ غربت کے خاتمے اور تعلیمی مساوات کے قیام میں بھی مددگار ثابت ہوں گے۔

–